اے وستیاں ایہے ویہڑے جڈاں پکے تھیسن
لوکی اپنے گھریں اندر بہہ تے مونجھے تھیسن

ہک ڈینہہ ساڈے نینگر اپنے دیس کمیسن روزی
ہک ڈینہہ وستی دے پردیسی وستی کٹھے تھیسن

یاد کریسن نکے لا دے سب جھگڑے تے جھیڑے
دھیاں بھیݨیں جڈاں اپنے گھر توں پَرّے تھیسن

ہک ڈینہہ روہی رنگلی تھیسے ہاکڑہ واہندا راہسے
ٹوبھے ساڈے بھریے راہسن ٹبے ساوے تھیسن

دول نقارے وجدے راہسن ، ٹیپ آلا وی ہوسے
جھمر کیتے پِڑ اساڈے ہک ڈینہہ وڈّے تھیسن

مبشر رحمان