نیا اک رشتہ پیدا کیوں کریں ہم

بچھڑنا ہے تو جھگڑا کیوں کریں ہم

خموشی سے ادا ہو رسم دوری

کوئی ہنگامہ برپا کیوں کریں ہم

یہ کافی ہے کہ ہم دشمن نہیں ہیں

وفا داری کا دعویٰ کیوں کریں ہم

وفا اخلاص قربانی محبت

اب ان لفظوں کا پیچھا کیوں کریں ہم

سنا دیں عصمت مریم کا قصہ

پر اب اس باب کو وا کیوں کریں ہم

زلیخائے عزیزاں بات یہ ہے

بھلا گھاٹے کا سودا کیوں کریں ہم

ہماری ہی تمنا کیوں کرو تم

تمہاری ہی تمنا کیوں کریں ہم

کیا تھا عہد جب لمحوں میں ہم نے

تو ساری عمر ایفا کیوں کریں ہم

اٹھا کر کیوں نہ پھینکیں ساری چیزیں

فقط کمروں میں ٹہلا کیوں کریں ہم

جو اک نسل فرومایہ کو پہنچے

وہ سرمایہ اکٹھا کیوں کریں ہم

نہیں دنیا کو جب پروا ہماری

تو پھر دنیا کی پروا کیوں کریں ہم

برہنہ ہیں سر بازار تو کیا

بھلا اندھوں سے پردہ کیوں کریں ہم

ہیں باشندے اسی بستی کے ہم بھی

سو خود پر بھی بھروسا کیوں کریں ہم

چبا لیں کیوں نہ خود ہی اپنا ڈھانچہ

تمہیں راتب مہیا کیوں کریں ہم

پڑی ہیں دو انسانوں کی لاشیں

زمیں کا بوجھ ہلکا کیوں کریں ہم

Naya ek rishta paida kyun karen hum
Bicharna hai to jhhagra kyon karen hum

Khamoshi se adaa ho rasm-e-duuri
Koi humgama-barpa kyon karen hum

Ye kaafi hai ke hum dushman nahi hain
Wafaadari ka daava kyon karen hum

Wafa, ikhlaas, qurbani, mohabbat
Ab inn lafzon ka peecha kyon karen hum

Suna dain ismat-e-Maryam ka qissa
Par ab iss baab ko waa kyon karen hum

Zulekhaa-e-Azeezaan baat ye hai
Bhala ghaatay ka sauda kyon karen hum

Hamari hi tamanna kyon karo tum
Tumhari hee tamanna kyon karen hum

Kia tha ehad jab lamhon mein hum nay
To saari umar eefa kyon karen hum

Nahi dunya ko jab parwaah hamari
To phir dunya ki parwaah kyon karen hum

Barehna hain Sar-e-Bazaar to kia
Bhala andhon se pardah kyon karen hum

Hain baashinday issi bassti ke hum bhi
So khud par bhi bharosa kyon karen hum

Pari rehnay do insaanon ki laashain
Zameen ka bojh halka kyon karen hum

Ye basti hai muslamaanon ki bassti
Yahan kaar-e-maseeeha kyon karen hum